日本係香港人嘅第二個屋企，但原來係香港都可以影到日本神社入邊鳥居嘅感覺⛩️！
位於荃灣海安路嘅巨型橙色海景隧道，就係今日嘅主角。佢鄰近荃灣西約體育館，盡頭係海灣同埋叮九橋，係唔少人睇日落嘅好地方。
隧道入邊有行人道，都算幾寬敞，有唔少人係入邊踩單車同跑步，來來往往。隧道嘅正中間有一座天橋，係唔錯嘅拍攝位置。行上去就可以俯瞰成個隧道，將一格格橙色盡收眼底，有種行入左時光隧道嘅感覺。天氣好嘅時候，仲可以見到陽光斑斑駁駁咁穿透係隧道度添。而行去天橋嘅另一邊，就可以望到隧道外嘅海，波光粼粼，令人覺得好平靜。
圖片來自網絡
鍾意影相打卡嘅朋友，建議下晝三四點嘅時候去影。因為鄰近傍晚，太陽落山之際，天空會佈滿紫藍色嘅彩霞。隻色同赤橙色嘅隧道，相映成輝，影出黎會好似較左filter嘅電影poster咁，好有味道。
如果想影人像嘅話，用橙色嘅鐵柱作為前景都係唔錯嘅選擇。或者可以試下坐係隧道嘅外牆，有種不羈又落寞嘅感覺。除此以外，位於隧道中間嘅石墩，都係打卡嘅好地方。由低影上，囊括馬路同隧道頂端，帶出隧道宏大嘅感覺。
不過係影嘅時候，記得要注意安全。畢竟隧道內車來車往，大家係影之前都要睇清楚，確保道路冇車，同埋唔會影響到人，小心交通安全呀！
