夏天又黎啦，係尼個擁抱太陽嘅季節，船p，去沙灘，玩水，尼啲夏日活動又點少得一套啱自己又靚靚嘅泳衣呢？依家就同你分享幾個揀泳衣嘅小tips，等你買嘅唔使再一頭霧水。
泳衣種類：
其實泳衣最主要係分成兩個種類，第一種係連體式，第二種就係分體式。
連體式：
連體式，顧名思義就係一匹布過，中間冇分隔嘅泳衣。尼一種嘅泳衣，布料偏多（特別設計除外），可以有效遮擋身上面嘅肉肉，所以咩身形嘅女仔都合適。
分體式：
分上下兩件，可以分開穿著，比較方便，布料較少，亦都更加適合打卡。
選擇泳衣嘅準則：
唔同造型嘅泳衣，著出黎都會有唔同嘅效果。因此，我地可以因應自己嘅身形，去選擇一啲可以修飾到自己身材嘅泳衣。
漏斗身材：
如果你係腰線纖瘦，胸部比較豐滿嘅身材，可以選擇一啲上身有支撐力又簡約嘅泳衣，可以平衡返上下身嘅視覺效果。同時，都可以選擇一啲下身布料較少或者有花紋嘅款式，將視覺嘅焦點轉移至下身。
梨型身材：
下身以及肚子比較肥嘅女仔，就可以選擇分體式嘅泳衣，顏色上淺下深，可以起到修飾下肢嘅效果。或者選擇高腰裙擺嘅泳衣，都可以有效遮擋下身嘅肉肉。
上身單薄：
上身單薄嘅女孩子，可以選擇上身有圖案或者係花紋嘅泳衣，會有豐胸嘅效果。比基尼式嘅泳衣亦都可以幫助你展示苗條嘅身材，令上半身更有曲線。唔介意自己胸部大小嘅話，抹胸都會係一個好好嘅選擇
快啲拎住以上嘅指南，去揀啱你嘅泳衣啦！🩱
