一洗頭，一梳頭甩到就成個廁所都係頭髮；返完工pat陰就變左bar code咁一束束痴埋一齊……
相信依家睇緊尼篇文章嘅你同我都試過尼種情況，與人唔同嘅我地，到底係邊度出左問題呢？
依家就教妳點樣睇自己嘅頭皮健唔健康，同埋係屬於咩類型啦～
健康頭皮：
健康嘅頭皮大多數會呈現青白色，按落去有彈性，而頭髮都偏有韌性。除左睇頭皮之外，毛囊都係決定頭髮狀態嘅部位之一。健康嘅毛囊，大概每一個囊口會長有2-3條粗幼均勻嘅毛髮，且呈現漩渦形狀，囊口乾淨，冇嘢堵塞。
油性頭皮：
淡黃色係油性頭皮嘅特徵，因油脂分泌旺盛，往往伴隨著異味同埋脫髮嘅現象。油性頭皮因為油脂堵塞毛囊，容易出現炎症，因此頭髮數量會較少，而毛髮都會偏幼。
乾性頭皮：
經常出現頭皮屑，覺得頭皮繃緊同埋疼痛嘅大家，你地嘅頭皮就應該係屬於乾性頭皮啦。乾性頭皮多呈現灰白色，髮質偏粗糙，從髮縫望入去冇咩生氣。
咁係因為，乾性頭皮嘅油脂分泌偏少，導致毛髮變得幼細易斷，同時其角質層亦因此老化，變得乾燥。久而久之，係頭皮中剝落嘅頭皮屑就會塞住啲毛囊，令到毛囊冇辦法正常吸收養份，出現頭髮生長上的問題。
敏感頭皮：
同敏感肌一樣，敏感頭皮都會出現粉紅色嘅過敏反應，頭皮會呈現粉紅色嘅硬塊，稍稍一用力就會令頭皮疼痛。
敏感頭皮嘅成因與燙染頭髮嘅密度以及暴曬程度息息相關，同時，內分泌失調，敏感體質都會造成敏感頭皮。如果你突然出現好多頭屑、或者突然覺得頭皮痕癢，咁就要小心自己係咪敏感頭皮啦！
