被動收入就聽得多啦，被動減肥你又有冇聽過呢？
講到減肥，唔少人第一印象就係要做好多運動！但係講真，香港人日日都要返工，又邊有咁多時間可以去做運動啊。
但其實，減肥黎講飲食嘅作用係大過做運動㗎！所以！與其坐以待斃，不如由飲食落手啦！
咩係輕斷食？
其實輕斷食（全名間歇性斷食法）就係指一段特定嘅時間入邊，淨係飲水但唔進食。所以同節食唔同，同時都唔會好似節食咁，有大幅度嘅反彈。佢嘅原理係，身體嘅胰島素會係斷食嘅時段下降，提高我地嘅升糖數，從而達到消耗脂肪嘅效果。
輕斷食種類：
輕斷食都有分幾個種類，主要係以進食同埋斷食嘅時間比例去區分。
最為人常用嘅有以下4種：
16:8 斷食法
即係一日入邊有16個鐘係齋飲水唔食野，淨低嘅8個鐘就可以進食。
大家可以根據自己嘅時間去安排斷食嘅時段，因為其實訓覺嘅時間都係計算係斷食時間內㗎。
啱啱開始嘗試斷食嘅朋友仔都比較建議尼一種斷食法。因為空腹時間較短，所以係會比較容易堅持到。
18:6 斷食法
其實即係16:8嘅進階版，斷食嘅時間會拉長多2個鐘，有18個鐘係唔食得野。
尼一隻斷食法嘅難度會高少少，因為空腹時間長左。但與此同時，佢嘅成效都會顯著啲，平均一個禮拜可以減到1-3kg左右。
5:2斷食法
一個禮拜內有五日正常飲食，其餘兩日就進行斷食。
不過記得斷食嘅日子要隔日進行，例如禮拜一斷食完，就要等到禮拜三或之後先可以再進行斷食。
隔日斷食法
顧名思義，即係一日正常食飯，一日就全日淨係飲水。尼一種亦都係難度最高嘅一種，因為空腹時間最長。當然效果亦都係最最明顯！
輕斷食小提示：
-唔係每一個人都適合斷食法㗎！所以係進行前，最好係向醫生查詢自己嘅身體是否適合，同埋按照自己嘅生活作息去選擇相應嘅斷食法。
-進食嘅時候都要小心卡路里，唔好咩都擺入口！因為卡路里赤字，先可以幫助身體減到飛㗎！
